أرسلت هذه القصيدة للشاعر: وقيان بن فهد الصخابرة بدينا بذكر مكون الكون والمعبود=إله البرية خالق الخلق سبحانه عـليك الكتب يا بوك ثم رتبه بركود=وعلى أبوك يا طير السعد وزن قيفانه ونصه لشيخ ما بعد طب في المنقود=وهو نسل شيخ من على وقت شيبانه وهو حر نسـل أحرار من جا يبيه ايعود=ولا من ضرب يفرق قرين من أقرانه وترى شيخنا وقيان هو غاية المقصود=وخذا المجد ورث وارثه صلب جدانه وهو سعد من حده زمانه جفا وجحود=ويفرح إلى من طب في البيت ضيفانه ويفرح به اللي في اللقى قد حداه جنود=وحدّوه عدوانه يبي شوف ورعانه سلامي عليه عداد ما قد نبت من عود=وعداد من يطلب البيت واطّاف بركانه وسلامي على ناهض ومرضي وفهد الجود=وعلى كل قرمن لابة الطيب نيشانه وعسى الله يعز اللي حمو للبديع احدود=حمو حدهم لا عكر الجو عكنانه سلامي عليهم كل غمر وشباب وعود=على شانهم للطيب ساسه وعنوانه يقوله حكيم لابته لا جتما البارود=نهار اللقى عدوهم كثرت احزانه وداعين إلى من عضب النجد بالناجود=وجدي عن الخطار ما صك بيبانه وبيتي لعطران الشوارب بدون قيود=مع البن الأزرق بينهم ثار دخانه ترى انتو وحنا عايشين بأمن ورغود=تحت ظل ملك سعد شعبه وجيرانه فهد والفهد درع لنا من نسول أفهود=ذرى الدار وأهل الدار لا هاض بركانه أبو متعب لا جا اللقى حاضر ماجود=غني عن التعريف والعهد ما خانه وسلطان عز الدار والمسلمين شهود=حما للبلاد الجو من شر شيطانه أنا بذكر الله واذكره واذكر آل سـعود=وعسى معزي في الآخرة طيب أجنانه وصلاتي على المرسل نذير عن الماعود=عدد كل طير رف واصفق بجنحانه .................... هذه قصيدة الشاعر وقيان بن فهد الصخابرة رداً على قصيدتي البارحة يوم ادبح النجم يا بن سعود=وغـرق فكري الشارد بموجه وطوفانه جتني معانيها تسابق تقول اورود=وقمت أتخير وأخذ الحص والدانه ويا مرحبا عد المطر مع هـبوب النود=وبالصاحب اللي ما تنكر لصدقانه تحية وفا واجلال ومعطره بالعود=لبو مبارك نبدع القاف من شانه وقم يا نديبي وارسل الخط والمردود=ومن يفعل المعروف يجزى على احسانه ملفاك منهو يكرم الضيف راع الجود=كريم تبع منهاج جـده وعمانه نعشني كلامك مثل ما ينعش القرهود=كبود حداها الوقت في القيظ ظميانه ويا مرحبا وأهلين يا فزعة المظهود=وقول على فعل ترى بان برهانه من لابه لاجا الحرايب تقول وزود=ليا قام عج الخيل ثم ثار بركانه قلته وأنا من لآبه رايها معقـود=تدوس الخطر لا ضاق بالبر صوانه ويا سعد منا فزعته في نهار الكـود=إذا زاد حمو الجو من زود نيرانه أهل غرس حموه وفي جناحه تشوف الذود=وترى لابتي صخبور سوره وجدرانه يقوله اللي شاب رأسه وهو ملهود=أسير الزمان يشوف ذله وحقرانه دورات وقتي قاسية كأنها البالود=تغدى تعـشى وآخر الليل جوعانه ولا حد يلوم المرء لا قام بالمجهود=وترى الكامل الله موجد الخلق باتقانه وهذا الكلام الصح بالعد والمعدود=يا اللي كتبت الشعر وزنه وميزانه وجتك المعاني واضحة والنظر محدود=واحسب حساب الوقت زوده ونقصانه وترى البيت يرفع فوق والطنب له مشدود=وبيت الشرف ما يهدم الوقت بنيانه وترى المجد يبنى في نحور الليال السود=وعطيب الضرايب يارد الماء بذرعانه وبختم قصيدي بالتحية ودهن العود=وروض خضر لا فاح مسكه وريحانه

أدوات القصيدة

النسبة 2.87/5 (53اجمالي)

• 1
• 2
• 3
• 4
• 5